ەقىۇ پارلامەنتتىك اسسامبلەياسىنىڭ كۇزگى وتىرىسىندا ق ر پارلامەنت سەناتىنىڭ ءتوراعاسى قاسىم-جومارت توقايەۆ ۋكرايناداعى بەيبىت حالىققا قارسى جاسالعان اسكەري قىلمىستاردى تەرگەۋمەن اينالىسۋ قاجەتتىگىن اتاپ كورسەتكەن. بۇل تۋرالى قازاقپارات حابارلادى.
توقايەۆ مالىمدەگەندەي، ۋكراينا داعدارىسى تەك بارشا ۋكراين حالقىنىڭ عانا باسىنا تونگەن تراگەديا بولىپ وتىرعان جوق. سونىمەن قاتار ولار جاھاندىق قاۋىپسىزدىككە شىنايى قاتەر توندىرۋدە. ۋكرايناداعى بارلىق اسكەري ءىس-قيمىلدار، ەڭ الدىمەن ەقىۇ-نىڭ كومەگىمەن ۋكراينا مەن رەسەي كوشباسشىلارى اراسىنداعى سۇحباتتاستىققا جول بەرۋى ءتيىس. سەنات ءتوراعاسى ءوز سوزىندە قازاقستان پرەزيدەنتى نۇرسۇلتان نازاربايەۆتىڭ مينسكىدە جوعارى دەڭگەيدەگى كەزدەسۋ وتكىزۋ تۋرالى باستاما كوتەرگەنىن، وندا رەسەي مەن ۋكراينا پرەزيدەنتتەرى اراسىندا سۇحباتتاستىق تەتىگى ىسكە قوسىلعانىن جانە بايلانىس توپتارى اراسىنداعى كەلىسسوزدەردىڭ قايتا جاندانعانىن باسا ايتقان.
ەقىۇ-نى سانكسيالىق تەكە-تىرەستى دوعارۋعا شاقىرعان قاسىم-جومارت توقايەۆ ەقىۇ ۋكرايناداعى بەيبىت حالىققا قارسى جاسالعان اسكەري قىلمىستاردى تەرگەۋمەن اينالىسۋ قاجەتتىگىن دە اتاپ كورسەتكەن. سەبەبى، ادامزات بالاسىنا جاسالعان قىلمىستارعا كىنالىلەر جازاعا تارتىلۋى ءتيىس. بارلىق قيىندىقتارعا قاراماستان ورىندالۋى قاجەت. بۇل شارۋا ەقىۇ-نىڭ كىدىرتۋگە بولمايتىن ماڭىزدى مىندەتتەردىڭ ءبىرى.
قامشى-اقپارات
